TÜRKMENISTANDA GDA GATNAŞYJY ÝURTLARYŇ ARASYNDA «BEDEW BADY: GÜÝÇ HEM GÖZELLIK» ADY BILEN TELEWIZION FILMLERIŇ BÄSLEŞIGI GEÇIRILÝÄR

Ahalteke bedewleri türkmenleriň taryhynyň, milli dünýägaraýşynyň we mentalitetiniň aýrylmaz bölegidir. Onuň şekili Türkmenistanyň Döwlet tugrasyny bezeýär, oňa türkmen halkynyň baý medeni, edebi we saz mirasynyň uly bölegi bagyşlanypdyr.

Ahalteke bedewi türkmen halkynyň garaşsyzlygynyň, özbaşdaklygynyň we milli mertebesiniň nyşanlarynyň biridir. Türkmenistanyň Mejlisiniň kararyna laýyklykda, 2026-njy ýylyň «Garaşsyz, baky Bitarap Türkmenistan — bedew batly at-myradyň mekany» ýyly diýlip yglan edilmegi hem munuň aýdyň mysalydyr.

Häzirki wagtda atçylyk däplerini dikeltmek we ösdürmek Türkmenistanda döwlet syýasatynyň ileri tutulýan ugurlarynyň biridir. Dürli ýyllarda ýurtda atçylyk we atçylyk sporty üçin niýetlenen döwrebap infrastruktura desgalary guruldy. Türkmenistanyň ähli welaýatlarynda atçylyk sport toplumlary we beýleki degişli desgalar bina edildi. Atçylygyň ylmy we bilim binýady kämilleşdirilýär, bu ugurda halkara hyzmatdaşlyk yzygiderli giňeldilýär.

«Bedew bady: güýç hem gözellik» atly bäsleşige gatnaşmaga Garaşsyz Döwletleriň Arkalaşygyna agza ýurtlardan awtorlar çagyrylýar. Mälim bolşy ýaly, şu ýyl Türkmenistan GDA-da başlyklyk edýär. Onuň bu wezipedäki işleriniň maksatlarynyň biri-de dostlukly halklaryň arasynda medeni, taryhy, ynsanperwer we sport gatnaşyklaryny ösdürmekden ybaratdyr. Atçylyk pudagyndaky hyzmatdaşlyk bu wezipäniň möhüm ugurlarynyň biri bolup durýar.

Bäsleşige telekompaniýalar hem-de islendik ýaşdaky garaşsyz awtorlar gatnaşyp bilerler. Filmler rus ýa-da iňlis dilindäki terjime ýazgylarynyň (subtitr) görkezilmegi bilen islendik dilde bolup biler.

Bäsleşige dowamlylygy 15-30 minut bolan, tohum atlaryň taryhyna, atyň GDA agza ýurtlaryň halklarynyň medeniýetindäki ornuna we atçylyk sportuna bagyşlanan işler kabul edilýär.

Ähli filmlere kino sungatynyň hünärmenlerinden, atçylyk sportunyň ussatlaryndan hem-de medeniýet ulgamynyň bilermenlerinden ybarat bolan Bäsleşigiň eminleri tarapyndan baha beriler. Bahalandyrmagyň esasy görkezijileri – tema degişlilik, çeperçilik derejesi, operatoryň işiniň hili hem-de baş pikiriň özboluşlylygy.

Ýeňijiler diplomlar we ýadygärlik baýraklary bilen sylaglanar, olaryň işleri bolsa täjirçilik däl görkezilişlerde we bilim maksatnamalarynda görkeziler.

Bäsleşik we oňa gatnaşmagyň şertleri hem-de tertibi baradaky giňişleýin maglumatlar «Türkmenistan habarlar portalynyň» internet sahypasynyň https://turkmenistaninfo.gov.tm «Bedew bady: güýç hem gözellik» atly bölüminde ýerleşdirilen.

Habarlaşmak üçin telefon belgileri: (+993 12) 44-22-11, (+993 65) 71-59-18, (+993 65) 53-21-62.

Elektron salgysy: internationaltvtm@gmail.com