«RŽD LOGISTIKA» KOMPANIÝASY TÜRKMENISTANYŇ ÜSTI BILEN ÝÜK DAŞALYŞYNY ÖSDÜRMEK MÜMKINÇILIKLERINI ÖWRENÝÄR

Russiýanyň «RŽD logistika» kompaniýasynyň wekilleri Türkmenbaşy Halkara deňiz portunyň kuwwaty we Türkmenistanyň demirýollarynyň mümkinçilikleri bilen tanyşmak üçin iş saparyny amala aşyrdylar. 

«Türkmendeňizderýaýollary» agentliginiň metbugat gullugynyň berýän habaryna görä, myhmanlar deňiz portunyň umumy, konteýner, ýolagçy-parom we ürgün ýükler terminallarynyň tehnika taýdan enjamlaşdyrylyşy hem hödürleýän hyzmatlary bilen jikme-jik tanyşdylar. «RŽD logistika» kompaniýasynyň wekilleriniň Türkmenbaşy Halkara deňiz portunyň, «Demirýollary» AGPJ we «Türkmenistanyň ulag we logistika merkezi» PPJ-niň hünärmenleri bilen işewür duşuşygyň barşynda Türkmenistanyň ulag pudagynyň maddy-tehniki mümkinçilikleri ara alnyp maslahatlaşyldy we daşary ýurtly ýük iberijiler üçin döredilen artykmaçlyklar ara alnyp maslahatlaşyldy.

Şunuň bilen baglylykda, Owganystana we Eýrana däne ekinlerini ibermek üçin Russiýanyň Mahaçkala we Astrahan portlary bilen Türkmenbaşy Halkara deňiz portunyň arasynda yzygiderli daşamaçylyk mümkinçiligi, şeýle hem Türkmenbaşy bilen Astrahan portlarynyň arasynda konteýnerli ýük daşamagyň geljegi bellendi. Myhmanlar eger iş saparynyň netijeleri we alnan maglumatlaryň seljermesine görä, bu maksadalaýyk we hyzmatdaşlygy giňeltmek baradaky çaklamalar amatly bolsa, 2024-nji ýylyň mart aýyndan başlap, Türkmenbaşy Halkara portuna deňiz arkaly ýük eltip bermäge gyzyklanma bildirdiler. Olar geçirilen derňewiň netijeleri boýunça tekliplerini resmi kanallar arkaly ibererler. Rus kompaniýasynyň wekilleriniň Balkan welaýatyna iş saparynyň meýilnamasyna «Bereket» we «Ak ýaýla» demir ýol menzillerine baryp görmek hem girýärdi. «RŽD logistika» (RŽDL) «RŽD» APJ-nden bölünip aýrylan kompaniýadyr, ol RŽD holdingiň logistika işini ösdürmek maksady bilen, 2010-njy ýylda döredilipdi. Bu işewürligiň ähli görnüşleri üçin ulag we logistika hyzmatlarynyň doly toplumyny hödürleýän, giň gerimli, köp ugurly hyzmat we logistika kompaniýasydyr. Bu kompaniýa esasy ýük operatory hökmünde Demirgazyk – Günorta halkara ulag dälizi boýunça ýük daşamagy amala aşyrýar. «RŽD logistika» kompaniýasynyň özbaşdak işleýän sowadyjy konteýnerler parky bar we kireýne alnan ýük wagony parkyny dolandyrýar, bu bolsa hiç kime bagly bolmazdan, demir ýol, deňiz ýoly we awtomobil ulaglary bilen üznüksiz ýük daşamaga mümkinçilik berýär.