TÜRKMENISTANDA SAÝLAWLARY WE SALA SALŞYKLARY GEÇIRMEK BARADAKY MERKEZI TOPAR: TÜRKMENISTANDA PARLAMENT SAÝLAWLARY ÝOKARY IŞJEŇLIK ÝAGDAÝYNDA GEÇDI

2018-nji ýylyň 26-njy martynda Saýlawlary we sala salşyklary geçirmek baradaky Merkezi toparyň başlygy G.Myradow Mejlisiň deputatlygyna, halk maslahatlarynyň we Geňeşleriň agzalygyna geçirilen saýlawlaryň netijeleri boýunça Merkezi toparyň maslahatlar otagynda brifing geçirdi.

Brifinge halkara we daşary ýurtly synçylar, ýurdumyzda akkreditirlenen daşary ýurtly žurnalistler we ýerli habar beriş serişdeleriniň wekilleri gatnaşdylar.

Saýlawlary we sala salşyklary geçirmek baradaky Merkezi toparyň başlygy G.Myradow  Mejlisiň altynjy çagyrylyş deputatlarynyň saýlawlary saýlawçylaryň ýokary işjeňlik ýagdaýynda ses bermekleri bilen geçirildi diýlip ykrar edilendigini mälim etdi. Milli parlamentde öz saýlawçylarynyň bähbidini goramak hukugyna watandaşlarymyzyň arasynda uly hormatdan we ynamdan peýdalanýan adamlar dalaşgärlik etdiler. Mejlisiň deputatlygynyň bir ornuna birnäçe dalaşgärler bellige alyndy. Seýlelikde, saýlawlar giň bäsdeşlik esasynda, demokratik we aýdyňlyk ýagdaýynda geçdi.

Bu gezekki saýlawlaryň aýratynlygy, welaýatlaryň we Aşgabat şäheriniň birnäçe saýlaw uçastoklarynda saýlawlaryň geçirilişine onlaýn arkaly syn edip bolanlygydyr.

Merkezi toparyň başlygynyň belleýşi ýaly, saýlaw çäreleriniň barşyna gözegçiligi 4072 milli we 142 halkara we daşary ýurtly synçylar amala aşyrdylar. Halkara we daşary ýurtly synçylar BMG, GDA, ÝHHG-niň demokratik institutlar we adam hukuklary baradaky edarasyna, ŞHG, YHG ýaly halkara guramalaryna, hem-de ABŞ, Awstriýa Respublikasy, BAE, Eýran Yslam Respublikasy, Türkiýe, Hytaý Halk Respublikasy, Pakistan we GDA girýän döwletlere wekilçilik edýärler.

Mejlisiň deputatlygyna, halk maslahatlarynyň we Geňeşleriň agzalygyna geçirilen saýlawlary ýurdumyzda akkreditirlenen daşary ýurtly žurnalistler we ýurdumyza aýratyn çakylyklar esasynda gelen köpçülikleýin habar beriş serişdeleriniň wekilleri şöhlelendirdiler.

Seýle hem, Mejlisiň deputatlygyna, halk maslahatlarynyň we Geňeşleriň agzalygyna geçirilen saýlawlarda jemi Türkmenistan boýunça bellige alynan 3 291 312 saýlawçylardan 3 017 801 adam ses bermäge gatnaşandygy, we munuň jemi saýlawçylaryň 91.69 göterimine deň gelýändigi aýdyldy.

G.Myradow 25-nji martda sagat 19.00-da saýlaw uçastoklarynda ses bermek tamamlandy we ses sanamak işi başlady diýip mälim etdi we daşary ýurtlardaky saýlaw uçastoklaryndan maglumatlaryň iberilmegi dowam edýändigini aýtdy. Ol ses bermegiň netijeleri hakyndaky maglumaty kanun tarapyndan kesgitlenen wagtda aýan ediljekdigini aýtdy.